Alam Katresnan

dening: Eko Y. Purnanto

Mung siji kali mili

rina wengi tanpa pungkas iline

tumelung gampeng mbambing

tumungkul jurang cerung

rina wengi tanpa asat weninge

Ngematake sejatine tentrem

srengenge ngiyup lintang sumiyut

rembulan leledhang

bumi wedi kumrisik

bebarengan ngilo sajerone

tumungku lair batine

Rina wengi banyu kali dicidhuki

ngombe lan reresik rumesep ing bale somah

wadon bekti ing guru laki

anak kesinungan budi pekerti

nyawiji ing kiblat

laras keplase ancas

Jroning wening wujude kekuatan

tanpa wates

kesurung ombere pangerten agung

anane kang nganakake

rina wengi

dadi iwak wader slulup lan lelangen

tanpa pungkas disilemi

taat tumungkul mung marang sawiji

sejatine panguripan

gumelar sajembare iman

Jakarta, Juni 1996