Bulak Amba

dening: Irul S. Budianto

bulak amba wetan desa

jaman biyen nggembol sewu crita

mangsa rendheng utawa ketiga ora ana bedane

kang sarwa tinandur ledhung-ledhung godhonge

bulak amba wetan desa

esuk nganti sore ora nate sepi

gumyake kadang tani nepusi dina-dina

ketang ngliga dhadha ora ana sing moyoki

yen wengine wis seba

konang-konang mesem pamer cahya

ing suketan jangkrik-jangkrik tetembangan

lagu-lagu kamardikan

dadi langgam sing bisa ndudut ati

saurute wanci

bulak amba wetan desa

jaman biyen nggembol sewu crita

guyub rukune kadang tani ora nate wudhar

bareng lakune tradhisi sing isih ajeg kababar

bulak amba wetan desa

aja kaget yen saiki critane beda

ing saben pecak thukul cor-coran beton

saenggon-enggon rinengga lampu plenthon

njalari aku lan sliramu kangelan nggoleki

konang lan jangkrik sing bisa miyak sepi

2016