Malem Kemislegen

dening: Suryanto Sastriatmojo

Iki malem Kemislegen, natkala sawang-sawangan kepangguh

Aku memet anggoleki bloknut isi wawancara

Ingdalem tugas juruwarta

Alam lan bumi bajang karacut

Manuk dalanan sing luru pangan

Malem desa-ngadesa linempuh

Parikan lejem tuwin ginem anteng

Satuhu golek ijowan karep

Gumonling ing sumur srumbungan

Yakuwi malem Kemislegen wus adoh saka ngantuk lan lutuk

Mamring patemon dumadi saloring Pathuk

Mamrih tembang pasuketan neng ara-ara zinah

Ngarah tembung panganti sing isih pentil

Ngglandhang playune ambung kapilarung

Nguja tumanjane malem Kemislegen neng pondhok tingal

Ajue laras lan aras

Mingser ngetan lan sedhela-engkas ngulon

Angger rawuhmu dadi isarat ketemu

Sinambi kala-kala marsudi

Tumangkare udi, uni tuwin ugemi

Ingendi malem Kemislegen pinarahan tegal lelaten

Dudu sawah pusa sing lumpure ngudubilah

Dene para sanak akeh sing kapiran

Ngunggahi panemu dalasan wawasan jaman

Jam rolas kurang seprapat, ana dhayoh adoh

Mbukak pituwase sang juruwarta

Ngemonah malem Kemislegen dadi urek-urekan mangsi

Tumekaning radhio lan televisi ngoyak tata-kendhali

Ning manah kang tuwajuh panggah kebenthus lawang

Kandheng ing dhokumen pesing katrocohan udan esuk

Dhuh, ibune thole, mumpung dina durung kesuk

Kene jiwa bakal nyrumbung, kene laku bakal nyerung

Pralampita gotrah sing diencup dening jasat sajatos

Kongsi ngakir jaman.

Nagasari, akir taun 1996