Marina

dening: Bela Safira

Dalan aspal kang kaya ora ana enteke, dak pecaki kanggo nggoleki sliramu

Wedhimu semebar alus  ngelus kulitku, nalika aku wiwit wani nyedhak wates gisikmu

Semilir angina ngampiri kupingku, ngrayu…

Sajak ngajak mripatku  nggatekake endahing gelitaning  gisik kang kasempyok banyu

Aku kesengsem ngematake egal-egole ombak kang mapag tekaku

Dak rikatake lakuku,

Nyuntakake kangenku lelumban ing beninge banyumu

Byuuuur…..

Seger rasa sakranduning ragaku

Anyes... sumulusup sela-selaning kalbu

Lara lunga..., tamba teka... 3x

Ilang sakalir lelara...

Dak ambali bola-bali slulup mbarengi alun kang alus  nelesi ragaku

Dak eremake mripatku, ngematake saben sempyokan ombak sing kemrecek dolanan watu

Ana rasa ayem..., tentrem lan marem...

Marina...

Tetepa mesem ayu, sepaya kapang iku ora layu kentir ing wektu

Aku bakal nemoni awakmu ing pinggire gisikmu kang biru

Banuyuwangi, 25 April 2023