Peksi Jalanidi

dening: Jefriyanto

Angin lelayaran ing kutha-kutha

amikuli carita-carita ing antaraning

ganda-ganda

Dedalanan ing ngarep ngawe-awe

mituduhake isih ana gawe

ing papan lan wektu

kang tembe

Jroning panduluku

dakrakit maneh donya-donya

kang sasap ing lakuning

lodhang lan wektu

Ana gegambaran sliramu

kang gemuyu amiji

pasugatan kanggo

sawijining tamu

Rehne sang tamu iku aku

Kasuwuna paras kang ayu

kang wus dumadi tandha tuhu

tumrap laku-laku

Baturraden, 2017