Sinom

Tembang Sinom

Sinom (ꦱꦶꦤꦺꦴꦩ꧀) gegayutane karo tembung sinoman, yaiku budaya kumpulane pamudha kanggo mbyantu wong kang nggelar pista utawa nduwe kajat. Ana uga andharan liya kang ngendikakake dene sinom ana gegayutane karo upacara-upacara ngenani agama tumrap bocah-bocah nom nalika jaman biyen. Ing sajrone Serat Purwaukara, sinom diwenehi teges sekaring rikma utawa anak rambut. Saliyane kuwi, sinom uga diartekake minangka “daun muda” saengga kadhang kala diwenehi pratandha utawa tetenger ngenani samubarang kang nggambarake godhong kang isih nom.

Negesi tembung sinom ing budaya Jawa jaman saiki asale saka tembung “si” (sang) lan “(a)nom” (muda). Yen kekarone digandheng dadi siji, ing Basa Indonesia nduweni teges “dia sang pemuda” utawa “dia yang masih muda”. Mula saka kuwi, ing filosofi kabudayan Jawa, sinom digambarake minangka watak saka pamudha kang kebak rasa pengin wruh babagan donya, ora nduwe rasa wedi, lan tansah sumringah.

Paugerane tembang Sinom yaiku:

Guru gatra cacahe 9, guru wilangan 8,8,8,8,7,8,7,8,12, guru lagu a,i,a,i,i,u,a,i,a.

Tuladha tembang Sinom:

Langit iki katon padang

Kaya padange ning ati

Ngilangake rasa malas

Sing tansah ngrogoti ati

Aku tansah taberi

Menyang ing papan sinau

Golek ilmu manfaat

Kanggo sanguning urip

Dadi wong sing migunani marang bangsa

                    Lakune bocah sekolah

                    Sinau rina lan wengi

                    Kudune bocah sekolah

                    Mesti pinter lan setiti

                    Nanging jaman saiki

                    Sinanune ora luhur

                    Karo seneng dolanan

                    Ora bisa migunani

                    Mung bisa njaluk lan nyusahke wong tuwa

Kanca ingkang katresnanan

Kanca kang jaler lan estri

Kanca kang apik lan ala

Saka mbiyen nganti iki

Aja padha ngerahi

Supaya uripe rukun

Aja padha kerahan

Lan gawe laraning ati

Iku kabeh gawe rukun marang kanca

                    Rajae raja utama

                    Patihe patih linuwih

                    Pra nayaka tyas raharja

                    Panekare becik-becik

                    Parandene tan dadi

                    Paliyasing kala bendhu

                    Mandar mangkin andadra

                    Rubeda angribedi

                    Beda-beda ardaning wong sanegara

Mangkya darajating praja

Kawuryan wus sunyaruri

Rurah pangrehing ukara

Karana tanpa palupi

Atilar silastuti

Sujana sarjana kelu

Kalulun kalatidha

Tidhem tandhaning dumasi

Ardayengrat dene karoban rubeda

                    Bonggan kang tan merlakena

                    Mungguh ugering kaurip

                    Uripe lan tri prakara

                    Wirya, arta, wi sinasis

                    Kalawun konsi sepi

                    Saka wilangan tetelu

                    Telas tilasing janma

                    Aji godong jati aking

                    Temah popo papariman mulandhana

Nuladha laku utama

Tumrape wong tanah jawi

Wong agung ing Ngeksiganda

Penambahan Senopat

Kepati Amarsudi

Sudane hawa lan napsu

Pinepsu tapa brata

Tanapi ing siyang ratri

Amamangun karyenak tyasing sesama

                    Amenangi jaman edan

                    Ewuh aya ing pambudi

                    Melu edan nora tahan

                    Yen tan melu anglakoni

                    Boya keduman melik

                    Kaliren wekasannipun

                    Dilalah kersa Allah

                    Begja-begjane kang lali

                    Luwih begja kang eling lawan waspada

Katetangi tangis sira

Sira sang paramengkawi

Kawileting tyas duhkita

Kataman ing reh wirangi

Dening upaya sandi

Sumaruna anerawung

Mangimur manuhara

Met pamrih melik pakoleh

Temah suka ing karsa tanpa wiweka

                    Dasar karoban pawarta

                    Bebaratan udan lamis

                    Pinudya dadya pangarsa

                    Wekasan malah kawuri

                    Yen pinikir sayekti

                    Mundhak apa aneng ngayun

                    Andhedher kaluputan

                    Siniraman banyu lali

                    Lamun tuwuh dadi kekembanging beka

Ujaring panitisastra

Awewarah asung peling

Ing jaman keneng musibat

Wong ambeg jatmiko kontit

Mengkono yen niteni

Pedah apa amituhu

Pawarta lolawara

Mundhak angreranta ati

Angurbaya angiket caritaning kuna

                    Sedulur padha elinga

                    Temenana nggonmu urip

                    Bekti biyung bekti bapa

                    Duwe pakerti kang becik

                    Tumindhak kang pratitis

                    Kakang adhi tansah rukun

                    Tuladha kang utama

                    Lung tinulung nora lali

                    Kabeh mau kanggo kluarga kang mulya

Pangéran kang sipat murah

Njurungi kajating dasih

Ingkang temen tinemenan

Pan iku ujaring dalil

Nyatané ana ugi

Iya Kiyageng ing Tarub

Wiwitané nenedha

Tan pedhot tumekèng siwi

Wayah buyut canggah warèngé kang tampa

                    Mangaler pariwisata

                    Prapteng tlatah Arjosari.

                    Ing sendhang Tirta Husada.

                    Toya anget handayani.

                    Usadaning sesakit.

                    Seger sumyah raosipun.

                    Ing dhusun Karangreja.

                    Siram eca kang sinambi.

                    Anjangsana ngiras ngupaya usaha

Sun iki dhutaning nata

Prabu kenya majapahit

Kekasih damar sasangka

Atma mantune ke patih

Magang anyar awak mami

Lahta bisma praptaningsun

Ingutus sang narpendah

Kinen mocok murdatanji

Marmaningsun ingutus ywa mindho karya

                    Guwa Clangap ing Tulakan

                    Sudimara Guwa Kambil.

                    Papringan ing Ngadireja.

                    Somopura tambah malih.

                    Giri Tundha anenggih.

                    Sisih elor Guwo Penthung.

                    Kang manggen ing Tulakan.

                    Jumbuh lan ingkang den rawi.

                    Kang kasusra Pacitan ing Sewu Guwa